• 地點:Taiwan
• 發布日期: 2020/11/17
• 單位:聯合新聞網
• 更新日期:2020/11/17
• 點閱次數:380

သုံးထပ်ကွမ်းနှိုးဆော်သည့်ဘောက်ချာ အသုံးပြုနိုင်သည့်ကာလမှာ နှစ်ကုန်အထိဖြစ်ပြီး ဘောက်ချာစာရွက်များ ကျန်နေသေးသည်ဟု ခန့်မှန်းရသည်။ အုပ်ချုပ်ရေးဌာနကြီး အကြီးအကဲ စူးကျန်းချန်း (蘇貞昌) က ထိုင်ဝမ်၌ ကာလကြာနေထိုင်သူ၊ ဂုဏ်ထူးဆောင်သူနှင့် ထိုင်ဝမ်ရောက်သံတမန်များ စသည့်နိုင်ငံခြားသားများကို ကျေးဇူးတင်ရှိ ကြောင်း ဖော်ပြရန်အတွက် သုံးထပ်ကွမ်းနှိုးဆော်သည့်ဘောက်ချာ ထုတ်ယူအသုံးပြုနိုင်သူများ အသစ်ထပ်တိုး လိုက်ကြောင်း၊ အကျုံးဝင် အမြဲတမ်းနေထိုင်ခွင့်လက်မှတ် ကိုင်ဆောင်ထားသူ၊ သံတမန်ကတ် ကိုင်ဆောင်ထားသူတို့သည် နိုဝင်ဘာလ ၁၆ ရက်နေ့မှစ၍ သုံးထပ်ကွမ်းဘောက်ချာ ထုတ်ယူနိုင်ကြောင်း၊ လူဦးရေ ၁၃၀၀၀ ကျော်နီးပါး အကျိုးခံစားရမည်ဟု ခန့်မှန်းကြောင်း ဌာန၏အစည်းအဝေး၌ ပြောကြားပါသည်။ 

စီးပွားရေးဝန်ကြီးဌာနမှ ယနေ့တွင် အုပ်ချုပ်ရေးဌာနကြီး အစည်းအဝေးသို့ “သုံးထပ်ကွမ်း နှိုးဆော်သည့်ဘောက်ချာ ထပ်တိုးထုတ်ပေးသူများဆိုင်ရာ အစီရင်ခံစာ” သွားရောက်တင်ပြရာ၌ နိုဝင်ဘာလ ၁၆ ရက်နေ့အထိ ဘောက်ချာစာရွက် ထုတ်ယူသူများ ၂၁.၁၈ သန်းနီးပါးရှိကြောင်း၊ ဒစ်ဂျစ်တယ်ချိတ်ဆက်သူ ၁.၈ သန်းခန့်ရှိကြောင်း၊ ဘောက်ချာစာရွက် ထုတ်ယူသူနှင့် ဒစ်ဂျစ်တယ်ချိတ်ဆက်သူ ၂၃ သန်းနီးပါးရှိကြောင်း၊ နိုင်ငံသား ၉၇% နီးပါး ထုတ်ယူအသုံးပြုပြီးဖြစ်ကြောင်း ပြောကြားပါသည်။

သို့သော် ဘောက်ချာစာရွက် အရေအတွက်စုစုပေါင်း ၂၂ သန်း ရိုက်နှိပ်ထားသည်။ ယခုအကြိမ် သုံးထပ်ကွမ်းဘောက်ချာ ထပ်တိုး ထုတ်ပေးသူများမှာ အမြဲတမ်းနေထိုင်ခွင့်လက်မှတ် ကိုင်ဆောင်ထားသူများ ဖြစ်ပြီး ထိုင်ဝမ်၌ ဆက်တိုက် ၅ နှစ် နေထိုင်သူ၊ သို့မဟုတ် ဂုဏ်ထူးဆောင်ထားသူ၊ သို့မဟုတ် အဆင့်မြင့်ထူးချွန်သူ၊ သို့မဟုတ် ထိုင်ဝမ်ပြည်သူများ အတွက် ကိုယ်ကျိုးမဲ့ အကျိုးပြုဝန်ဆောင်မှုသည့် အထူးတာဝန်ထမ်းဆောင်သော ပုဂ္ဂိုလ်များ စသဖြင့်ပါဝင်ရာ ထိုင်ဝမ်အပေါ် နက်ရှိုင်းသောသံယောဇဉ်ရှိသူများ ဖြစ်ပါသည်။

ထို့ပြင် သံတမန်ကတ် ကိုင်ဆောင်သူများနှင့်စပ်လျဉ်း၍ ထိုင်ဝမ် သံတမန်ရေးရာလုပ်ငန်းအနေအထား ခက်ခဲမှုကို ထည့်သွင်းစဉ်းစား၍ သုံးထပ်ကွမ်းဘောက်ချာ၏ “နွေးထွေးမှု” ကို သံတမန်များထံ ဖြန့်ဝေပေးရန်လည်းကောင်း၊ ထိုင်ဝမ်၏နွေးထွေးမှုနှင့် လူသားဆန်မှုကို ခံစားသိရှိနိုင်စေရန်လည်းကောင်း၊ ထိုင်ဝမ်အပေါ် အသိအမှတ်ပြုမှုနှင့် သံတမန်ချစ်ကြည်ရေး နက်ရှိုင်းစေရန်လည်းကောင်း သုံးထပ်ကွမ်း ဘောက်ချာ ထပ်တိုးထုတ်ပေးသူများအဖြစ် ထည့်သွင်းခြင်းဖြစ်ပါသည်။ 

နိုဝင်ဘာလ ၁၆ ရက်နေ့မှစ၍ တစ်နိုင်ငံလုံးရှိ ဒေသအသီးသီး၏ စာတိုက်များ၌ သုံးထပ်ကွမ်းဘောက်ချာစာရွက် သို့မဟုတ် ဒစ်ဂျစ်တယ်ချိတ်ဆက်မှုပစ္စည်း ထုတ်ယူနိုင်ပါသည်။ သံတမန်ကတ် ကိုင်ဆောင်ထားသူများကို နိုင်ငံခြားရေးဝန်ကြီးဌာနမှ တပြေးညီ ကူညီ ထုတ်ပေးသွားမည်။

အကြီးအကဲ စူးကျန်းချန်း (蘇貞昌) က ယခုအကြိမ် တိုးချဲ့ထုတ်ဝေပေးရသည့် အကြောင်းရင်းကို ရှင်းလင်းပြောကြားရာ၌  နိုင်ငံတော်ဖွံ့ဖြိုးတိုးတက်ရေးကောင်စီ ဥက္ကဌ ကုံမင်ရှင်း (龔明鑫) မကြာမီရက်ပိုင်းက ဌာန၏ အစည်းအဝေး၌ ထိုင်ဝမ်ရှိ နိုင်ငံခြားသားများအား သုံးထပ်ကွမ်းဘောက်ချာ ထုတ်ပေးခြင်းပြုမပြု အဆိုပြုခဲ့ကြောင်း၊ အတွင်းရေးမှူးချုပ် လီမုန်ရန် (李孟諺) မှ အကြံပြုချက်များကို အကြိမ်ကြိမ်စုဆောင်း သုတေသနပြု ဆွေးနွေးပြီးနောက် ဆောင်ရွက်နိုင်သည်ဟု အတည်ပြုကာ ယခုအကြိမ် ကျေးဇူးတော်နေ့၊ ခရစ်စမတ်နေ့ မတိုင်မီရက်တွင် ထုတ်ပေးမည်ဖြစ်ကြောင်း၊ ထိုသို့ဆောင်ရွက်ခြင်းဖြင့် ၎င်းအသိုက်အဝန်း နှစ်ခုအပေါ် ကျေးဇူးတင်ကြောင်း ဖော်ပြပြီး ၎င်းတို့အား ယခုနှစ်၏ အရေးကြီးဆုံးသော နှိုးဆွသုံးစွဲမှု (三倍券) မူဝါဒတွင် အတူတကွပါဝင်လာရန် ဖိတ်ခေါ်ကြောင်း ပြောကြားသည်။

အကြီးအကဲ စူးကျန်းချန်း (蘇貞昌) က စီးပွားရေးဝန်ကြီးဌာနမှ သုံးထပ်ကွမ်းဘောက်ချာ ထုတ်ပေးသည့်နည်းလမ်း ချက်ချင်းပြင်ဆင်ချမှတ် ရမည်ဖြစ်ကြောင်း၊ ပြည်ထဲရေးဝန်ကြီးဌာနမှလည်း ထပ်တိုးလာသည့် ထုတ်ယူနိုင်သည့်အမည်စာရင်းကို အတည်ပြုရမည်ဖြစ်ကြောင်း၊ သက်ဆိုင်ရာ ထုတ်ဝေခြင်း၊ ထုတ်ယူအသုံးပြုခြင်းလုပ်ငန်းစဉ်များကို သက်ဆိုင်ရာဌာနများ၊ ကျံုးဟွာစာတိုက်ကုမ္ပဏီ (中華郵政) တို့မှ အင်တိုက်အားတိုက် ပူးပေါင်းဆောင်ရွက်ရမည်ဖြစ်ကြောင်း၊ ဤကောင်းမွန်သောဆန္ဒကို အကောင်းဆုံးဖြစ်အောင် ဆောင်ရွက်ရမည် ဖြစ်ကြောင်း သတိပေးပြောကြားပါသည်။